“Umore Azoka ezinbesteko plaza bihurtu da euskal konpainientzat”. XVI. Leioako Umore Azokan parte hartuko duten Euskal Herriko konpainien aurkezpena egin du Ana Lopez azokako zuzendariak Bilbon Euskadiko Artxibo Historikoan, Joxean Muñoz Eusko Jaurlaritzako Kultura, Gazteria eta Kirol Sailburu ordearekin batera eskainitako prentsaurrekoan. Jaialdiak euskal konpainiekin duen lotura nabarmendu du Lopezek bertan. Azaldu duenez, urteroko hitzordua da Leioakoa Euskal Herriko kale arteetan dabiltzan sortzaileentzat, eta aurtengo edizioa ez da salbuespena izango.

Guztira, 17 euskal konpainiek hartuko dute parte XVI. Edizioan -iaz baino 4 gehiago-, eta horietako 12k obra berria estreinatuko dute: Cielo Raso konpainiak, Colectivo Hiriko taldeak, Dantzaz Konpainiak, Dikothomia konpainiak, Ékoma Teatrok, Ertza Dantzak, Gaitzerdi Teatrok, La Pez taldeak, Muyuyay taldeak, Pez Limbok, Rouge Eléak, eta Zirkozaurrek, hain zuzen ere. Horiekin batera izango dira Kukai, Hortzmuga, Etorkizuna Kontzeptuak, eta Markeliñe taldeak lanik berrienak aurkezteko. Leire Mesa dantzariak, bestalde, hurrengo urtean estreinatuko duen Twisten the balance proiektua aurkeztuko du. “Horrek erakusten du Umore Azoka bertako profesionalen egutegiaren parte bihurtu dela”, ziurtatu du Lopezek. Eusko Jaurlaritzak kale arteak eta arte eszenikoak bultzatzeko martxan dituen programak aurkeztu ditu Muñozek kazetarien aurrean.

Euskal konpainiek aurkeztuko dituzten obren aniztasuna ere azpimarratzekoa da, Lopezen ustez. “Umore Azokak ez duelako soilik umorea eskaintzen, eta era orotako kale arte eszenikoentzako erakusleiho bihurtu delako”. Hori gertatzen da egitarau orokorrarekin, eta hori gertatzen da euskal taldeen kasuan ere. Zazpi ikuskizunek dantza izango dute ardatz, seik antzerkia, hiruk zirkoa, eta instalazio multidiziplinar bat ere izango da. Gainera, Lopezek azaldu duenez, “proposamen berritzaileak” ekarriko dituzte taldeek. “Dantzaz konpainiako kideek, esaterako, Christophe Pavía ile-apaintzailearen orrazkerarekin dantzatuko dituzte Arriagaren doinu barrokoak nahiz Niña Coyote y Chico Tornado taldearen rocka”. Prentsaurrekoan hainbat euskal taldetako ordezkariak ere izan dira, eta Cielo Raso konpainiak bere lanetariko bat eskaini du.

100 PROFESIONAL BAINO GEHIAGO eta 35.000 BEGIRADA
Estatutik eta beste herrialdeetatik etorritako taldeekin batera arituko dira euskal konpainiak Umore Azokan. Guztira, 50 konpainia egongo dira, iaz baino 5 gehiago, eta 22 pieza estreinatuko dituzte orotara. Baina, Leioa ez da erakusleiho hutsa izango. Iaz Umore Azokara gerturatutako 35.000 ikusle ez gain, 100 profesional baino gehiagok ere eman dute izena, eta indartu egiten du horrek Umore Azokaren azoka izaera. Hori baita azokaren beste helburuetako bat: “Kale arteen industri garapena sendotzea”. Eta herritarrentzat festa dena, programatzaile eta banatzaileentzako salmentarako azoka ere bada. Zita garrantzitsua da horregatik ere Leioakoa euskal konpainientzat. Bertan aukera baitute beren ikuskizunentzako kontratu berriak lortu eta beren lana ezagutarazteko.

Gero eta konpainia gehiagok aukeratzen dute horregatik Leioa beren estreinaldiak aurkezteko, eta aurten bertan parte hartzeko izandako eskaera kopurua da horren froga, iaz baino 100 eskaera gehiago jaso baititu Umore Azokak, 400 inguru, guztira.

EUSKAL SOKUNTZA SUSTATZEN
Umore Azokak euskal konpainiekin duen konprimisoa ez da, ordea, jaialdi egunetara soilik mugatzen. Taldeei entseguak egin ahal izateko espazioak eskaintzen dituen kolaborazio hitzarmenak ere egiten ditu. Aurten, esaterako, babes berezia eskaini zaie Dikothomia konpainiari, Ékoma Teatroari, Hortzmuga Teatroari eta Laitrum Teatre/ Toti Toronelli. Lopezek eman du azalpena: “Umore Azokak sorkuntzarekiko duen konpromisoaren isla dira kolaborazio horiek, baina baita egitarau sendo bat osatu ahal izateko bide garrantzitsu bat ere”.

Sariak dira promozioa laguntzeko beste bideetariko bat, eta hiru dira aurten Umore Azokak banatuko dituen sariak. Kale ikuskizunik onenaren saria (trofeoa eta diploma), Euskadiko kale ikuskizunik onenaren saria (trofeoa eta diploma), eta Artista/Ikuskizun Berririk Onenaren Saria (hurrengo ikuskizuna sortzeko Hamekan erresidentzia). Errekonozimendua eskaintzeaz gain, kontratazioak lortzeko giltza garrantzitsuak dira sari hauek, epaimahaian beste jaialdietako zuzendariak daudelako, eta programatzaileentzako bermea direlako.