Euriak ezin izan du Leioako Umore Azoka gainditu. Leioako Udalak antolatutako Umore Azoka 2024 atzo arrakastaz amaitu zen, eta ia 14.000 pertsona bildu ziren herrian, alegia antolatzaileentzat bereziki zorrotza izan den edizio batean. Izan ere, egurualdiaren ondorioz, antolakuntzak egunero aldatu behar izan du programazioa, espazio alternatiboak bilatuz eta ordutegi berriak diseinatuz, ahalik eta ikuskizun gehien eskaini ahal izateko.

Azkenik eguraldi txarra izan arren, Udalak aurreikusitako konpainia guztiek parte hartzea lortu du eta programatutako 81 proposamenetatik 77 eskaini dira. Ez da erraza izan, eszenatoki alternatiboek jarduera bakoitzak eskatzen zituen ezaugarri tekniko eta espazialak bete behar izan dituztelako, nahiz eta edukiera murritzagoak aukeratu behar izan.

Publikoari dagokionez, Leioako Umore Azoka nabarmendu da herriko kaleetan sortu den giro onagatik, publiko orokorrak eta familiakoak izan duten erantzunagatik, nahiz eta euria egin.

Programazioari dagokionez, XXIV. edizio hau proposamenen kalitateagatik eta estreinaldi kopuruagatik nabarmendu daiteke, guztira 30 estreinaldi inguru izan dira bai estatalak bai nazioartekoak, dantza, antzerkia, clown, musika, performancea, zirkua, txotxongiloak, instalazioa, ikusizko arteak eta magia diziplinen artekoak.

Umore Azoka hitzordu berezi bihurtzen duten ezaugarrietako bat kaleko arteen industriaren garapena sustatzen laguntzea da, alde batetik, kaleko artista guztien arteko topagune gisa, eta, bestetik, sektoreko profesionalen arteko harremanetarako eta trukerako urteroko foro gisa. Aurten ere, artistek, erakundeek, enpresek, sareek eta publiko askok urteroko hitzordua izan dute Leioan, kaleko arte eszenikoen sorkuntza berrienak erakusteko edo ezagutzeko.

UMORE AZOKA 2024 SARIAK

Umore Azokak atzo esan zuen agur, eta bertan eman ziren ezagutzera edizio honetako sariak. Sari horiek artista parte-hartzaileen talentua eta sormena aintzatesten eta balioesten dute, baita sektoreko profesionalen ekarpena eta lana ere.

2024ko Euskadiko Ikuskizun Onenaren saria LA PEZ konpainiaren “Plaza” lanarentzat izan da, freskotasunagatik, hurbiltasunagatik eta publikoarekin duen erabateko komunikazioagatik. Tokikotik globalera doan erakusketa delako, bihotzarekin hitz egiteagatik eta dramaturgia berriak erabiltzeagatik, errespetua eta desberdintasunaren aldeko borroka bezalako balioak sortzeagatik.

2024ko Munduko Ikuskizun Onena CIE BALANCETOI & MALETA COMPANY konpainiaren “Claudette”-rentzat izan da. Erakusketa sinple eta, aldi berean, handi baten zirkuaren poetika eta txotxongiloak uztartzeagatik saritu dute ikuskizuna. Maila handieneko bi diziplinatan gauzatuta, belaunaldien arteko historiak emozioa eta samurtasuna eragin ditu ikusleen artean.

Azkenik, Umore Azokako epaimahaiak 2024ko Aipamen Berezia eman dio LA CORCOLES konpainiari, “H” izeneko erakusketagatik. Ikuskizunean, funanbulistak dotore eta eder dantzatzen zuen kablearen gainean.

Leioako Udala gaurtik bertatik ari da lanean Umore Azokaren XXV. edizioan, eta, gainera, datorren urtean zilarrezko ezteiak egingo ditu.

UMORE AZOKARI BURUZ

Leioako Udalak UMORE AZOKA – Leioako Kaleko Artisten Azoka antolatzen du duela 24 urte. 1988tik zegoen Umore Jaialditik sortu zen azoka, eta arrakasta handia izan zuen publikoaren eta kritikaren aldetik.

Helburu nagusia kaleko arteen industria (antzerkia, dantza, zirkua, musika, eta abar) garatzen laguntzea da, kaleko arteen sektore horien kontsumoa, ibilbideak eta koordinazioa sustatuz, eta konpainien/taldeen/artisten sustapena azpimarratuz.

Gaur egun, Umore Azoka ikuskizunak erakusteko eta sustatzeko gunea ere bada, eta, aldi berean, profesionalen arteko urteroko foroa, Estatuko Kaleko Arte Azoka garrantzitsuenetako bat, alegia.